Ба муносибати Рӯзи умумиҷаҳонии кӯдакон рӯзҳои 19-20 ноябр мулоқоти Ваколатдор оид ба ҳуқуқи кӯдак дар Ҷумҳурии Тоҷикистон Ҳабибуллозода Р.Ҳ. бо хонандагони муассисаҳои таҳсилоти умумии №№ 11, 55 ва 66 шаҳри Душанбе доир гардид.
Зимни мулоқот Ваколатдор оид ба ҳуқуқи кӯдак ба хонандагон дар бораи таърихи қабули Конвенсияи СММ дар бораи ҳуқуқҳои кӯдак ва аҳамияти он барои ҳифзи ҳуқуқҳои кӯдак маълумот дод. Аз ҷумла, қайд гардид, ки санади байналмилалии мазкур маҷмӯи ҳуқуқҳои шаҳрвандӣ, сиёсӣ, иктисодӣ, иҷтимоӣ ва фарҳангии (ҳуқуқ ба ҳаёт, ба шаҳрвандӣ, ба саломатӣ, ба донистани падару модар ва бархурдор будан аз ғамхории онҳо, ҳуқуқ ба муроҷиат, ба таҳсил, ба истироҳату фароғат, озод будан аз муносибати бад, озодона изҳор намудани ақида ва дигарон) кӯдаконро дар бар гирифтааст, ки барои инкишофи ҳамаҷонибаи онҳо заруранд.
Ҳамзамон Ваколатдор оид ба ҳуқуқи кӯдак дар бораи ғамхориҳои давлату ҳукумат бо сарварии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати кӯдакон, дастовардҳои ҷумҳурӣ дар самти ҳифз ва пешбурди ҳуқуқҳои кӯдак ёдрас шуда, қайд намуданд, ки эҳтиром, риоя ва ҳифзи ҳуқуқҳои кӯдакон, таъмини манфиатҳои беҳтарини онҳо, таъмини шароит барои инкишофи ҳамаҷонибаи кӯдакон яке аз афзалиятҳои муҳими сиёсати давлатӣ ба шумор меравад.
Дар доираи вохӯрӣ барои хонандагони муассисаҳои зикргардида аз ҷониби кормандони масъули мақомоти Ваколатдор оид ба ҳуқуқи инсон Викторинаи “Ҳуқуқ ё ӯҳдадорӣ?” гузаронида шуд. Хонандагон дар он фаъолона иштирок намуда, дониши хуб нишон доданд.
Дар интиҳои вохӯрӣ Ваколатдор оид ба ҳуқуқи кӯдак хонандагонро бо Рӯзи умумиҷаҳонии кӯдакон табрик намуда, ба онҳо китобчаи “Ҳуқуқҳои худро муҳофизат намо”, ки аз ҷониби Ваколатдор дар доираи фаъолият дар самти баланд бардоштани маърифатнокии кӯдакон оид ба ҳуқуқу озодиҳои онҳо таҳия гардидааст, тақдим намуданд.
