Рӯзи 20.11.2020 дар Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон бахшида ба 31-солагии қабули Конвенсияи Созмони миллали муттаҳид оид ба ҳуқуқҳои кӯдак Конференсияи ҷумҳуриявӣ дар мавзӯи «Принсипҳои иҷтимоӣ ва ҳимояи ҳуқуқҳои кӯдак» баргузор гардид, ки дар он намояндагон аз вазоратҳои маориф ва илм, Вазорати тандурустӣ ва ҳифзи иҷтимоии аҳолӣ, Вазорати корҳои дохилӣ, Вазорати адлияи Ҷумҳурии Тоҷикистон ва Хазинаи кӯдакони СММ (ЮНИСЕФ) иштирок ва суханронӣ карданд.
Дар конференсияи мазкур мутахассиси пешбари шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон дар Ҷумҳурии Тоҷикистон Машрабзода А. иштирок намуда дар мавзӯи «Механизми миллии ҳуқуқу озодиҳои инсон» маърӯза намуд. Ҳамзамон вобаста ба “Тартиби баррасиии муроҷиати кӯдакон дар мақомоти Ваколатдор оид ба ҳуқуқи инсон дар Ҷумҳурии Тоҷикистон”, ки бо фармони Ваколатдор оид ба ҳуқуқи инсон дар Ҷумҳурии Тоҷикистон аз санаи 19.09. 2020 №72 тасдиқ гардидааст ва он раванди қабул, бақайдгирӣ, баррасӣ ва ҳалли муроҷиатҳои кӯдакон, намояндагони онҳо ва дигар шахсонро аз ном ва ба манфиати кӯдакон дар мақомоти Ваколатдор оид ба ҳуқуқи инсон дар Ҷумҳурии Тоҷикистон муайян мекунад, изҳори ақида намуд.
Рафти конференсия тариқи онлайн бо марказҳои муассисаҳои таҳсилоти иловагии вилояти Суғду Хатлон, ВМКБ ва шаҳри Душанбе гузаронида шуда, хонандагон вобаста ба рӯзи ҷаҳонии кӯдакон мубодилаи афкор намуданд.
