Дар доираи иҷрои вазифаҳои худ ва бо мақсади шиносоӣ бо вазъи риояи ҳуқуқи кӯдаконе, ки дар Хонаи кӯдакони № 2 ш. Душанбе тарбия мегиранд, Ваколатдор оид ба ҳуқуқи кӯдак дар Ҷумҳурии Тоҷикистон Ҳабибулозода Р.Ҳ.санаи 12 ноябри соли ҷорӣ ба муассисаи мазкур боздид ба амал овард.
Зимни боздид Ваколатдор бо роҳбари муассиса ва мураббияҳо, ки бевосита бо таълиму тарбияи кӯдакон машғуланд, ҳамсуҳбат шуд. Суҳбат атрофи масъалаҳои таъмини манфиатҳои кӯдакон, эҳтиром ва риояи ҳуқуқҳои тарбиятгирандагони муассиса, шароити будубоши онҳо, муносибат бо кӯдакон ва дигар масъалаҳо сурат гирифт.
Дар рафти боздид маълум гардид, ки айни ҳол дар муассиса 82 кӯдаки то синни 6 сола бо таълиму тарбия фаро гирифта шудаанд. Мутахассисони соҳибкасб аз рӯи барномаҳои қаблан тарҳрезишуда бо кӯдакон кор мекунанд.
Шиносоӣ бо шароити нигоҳдорӣ нишон дод, ки дар муассиса шароити хуби санитарӣ ва моддиву маишӣ муҳайё аст. Муассиса ба системаи марказонидашудаи гармидиҳӣ пайваст аст.Аз ин рӯ, ҳарорати ҳаво дар ҷойҳои хоби кӯдакон, утоқҳои бозии онҳо ва умуман дар муассиса ба талабот мувофиқ аст. Кӯдакон бо либосҳои мавсимӣ таъминанд. Ба онҳо 4 маротиба хӯроки гарм пешниҳод карда мешавад. Вазъи саломатии кӯдакон хуб буда, дар замони боздид ягон нафар кӯдак бемор набуд. Кӯдакон бо бозичаҳои ба синну соли онҳо мувофиқ ва дигар маводҳои барои инкишофи онҳо зарур таъмин шудаанд.
Аз суҳбати Ваколатдор бо кӯдакон маълум гашт, ки хотири онҳо хеле болида аст ва онҳо ба Ваколатдор шеърҳои аз бар намудаашонро қироат намуданд.
Ваколатдор оид ба ҳуқуқи кӯдак аз натиҷаи боздид ва вазъи кӯдакон изҳори қаноатмандӣ намуда, ба роҳбарият вобаста ба муносибати инфиродӣ ҳангоми кор бо тарбиятгирандагони муассиса тавсияҳои худро пешниҳод намуд.
