5 октябри соли 2026 дар доираи сафари корӣ ба ноҳияи Мурғоби ВМКБ Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Нигора Аминзода бо роҳбарону кормандони сохторҳои давлатӣ, масъулони соҳаҳои дахлдор ва сокинони ноҳия вохӯрӣ баргузор намуда, қабули шаҳрвандонро анҷом доданд ва аз як қатор муассисаҳои иҷтимоӣ боздид ба амал оварданд.
Зимни вохӯрӣ масъалаҳои риояи ҳуқуқу манфиатҳои кӯдакон, масъулияти падару модар дар таълиму тарбияи фарзанд, баланд бардоштани маърифати ҳуқуқии аҳолӣ ва пешгирии ҳуқуқвайронкунӣ дар байни ноболиғон мавриди баррасӣ қарор гирифтанд. Ҳамчунин, муқаррароти қонунгузории Ҷумҳурии Тоҷикистон дар самти ҳифзи ҳуқуқи инсон ва кӯдак шарҳ дода шуданд.
Таъкид гардид, ки ҳифзи ҳуқуқу манфиатҳои кӯдакон масъулияти муштараки давлат, ҷомеа ва оила буда, фароҳам овардани шароити муносиб барои зиндагӣ, таълиму тарбия ва рушди ҳамаҷонибаи онҳо вазифаи муҳимми ҳар як ниҳоди масъул мебошад.
Дар рафти қабули шаҳрвандон муроҷиатҳои вобаста ба ҳуқуқу манфиатҳои кӯдакон шунида шуда, ба муроҷиаткунандагон машваратҳои ҳуқуқӣ пешниҳод гардиданд.
Ҳамзамон, бо мақсади шиносоӣ бо вазъи риояи ҳуқуқи кӯдакон ва шароити таълиму тарбия, хизматрасонии тиббӣ ва нигоҳдории шахсони дар ҷойҳои нигоҳдории муваққатӣ қарордошта, аз муассисаҳои томактабӣ, таълимӣ, беморхонаи ноҳия ва тавқифгоҳи муваққатии тафтишотии мақомоти корҳои дохилӣ боздид анҷом дода шуд.
