Рӯзи 26 февралии соли 2021 дар Китобхонаи миллӣ мизи мудаввар бо иштироки масъулини соҳаи маориф вобаста ба ҳамгироӣ ва густариши Низоми огоҳкунии бармаҳал дар доираи барнома ва механизмҳои мавҷудаи сатҳи ҷумҳуриявӣ, маҳаллӣ ва дохилимактабӣ бо маблағгузории Хазинаи кӯдакони СММ (ЮНИСЕФ) баргузор гардид, ки дар он намояндагони Вазорати маориф ва илми Ҷумҳурии Тоҷикистон, Академияи таҳсилоти Тоҷикистон, Пажуҳишгоҳи рушди маорифи ба номи Абдураҳмони Ҷомӣ, раёсат ва шуъбаҳои маорифи вилояти Хатлон, ВМКБ, шаҳрҳои Душанбе, Ваҳдат, Ҳисор, Исфара, ноҳияҳои Рӯдакӣ, Ҷ.Расулов, Деваштиҷ ва намояндагони сохторҳои ҷомеаи шаҳрвандӣ иштирок ва суханронӣ карданд.

Барномаи мазкур дар 112 муассисаҳои таълимии шаҳру ноҳияҳои таҷрибавии ҷумҳурӣ амалӣ карда мешавад ва ҳадафи ниҳоии барнома таълими босуръат барои кӯдакон ва наврасон, ки берун аз таҳсил қарор доранд, ба зинаи сеюми таълим фаро гирифтани кӯдакон, хусусан духтарон, татбиқи механизмҳои равонсозӣ ва ҳифзи ҳуқуқҳои кӯдакони зери таъсири муҳоҷират қарордошта, фарогирии кӯдакони имконияташон маҳдуд ба таҳсил ва нақши масъулини сатҳи миллӣ, маҳаллӣ ва дохилимактабиро дар ҳалли эҳтиёҷоти кӯдакон дар бар мегирад.
Дар ҳамоиши мазкур мутахассиси пешбари шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон дар Ҷумҳурии Тоҷикистон Машрабзода А. иштирок намуда, вобаста ба раванди огоҳонӣ ва пешгирии ҳуқуқвайронкунии ноболиғон, муайян намудани кӯдакони беназорат ва бепарастормонда, ки ба гурӯҳи хатар дохил мешаванд ва омодагии самараноки воридшавии онҳо ба ҳаёти ҷамъиятӣ тавассути оила, ҷомеа ва ҳамсолон, тайёрии касбӣ-техникӣ ва ба фаъолияти меҳнатӣ ҷалб кардани онҳо изҳори ақида намуд.