Санаи 7 марти соли 2024 дар мақомоти Ваколатдор оид ба ҳуқуқи инсон дар Ҷумҳурии Тоҷикистон ба ифтихори “Рӯзи Модар” мизи мудаввар таҳти унвони “Зан – олиҳаи зиндагӣ” бо иштироки кормандони Дастгоҳи Ваколатдор оид ба ҳуқуқи инсон ва намояндагони васоити ахбори оммаи ватанӣ баргузор гардид.
Дар чорабинии идона сараввал Ваколатдор оид ба ҳуқуқи инсон дар Ҷумҳурии Тоҷикистон У. Бобозода баромад намуда, бонувони мақомот ва дар симои онҳо тамоми модарону бонувони ҷумҳуриро бо фарорасии ҷашни барои ҳар як инсон муқаддаси “Рӯзи Модар” самимона муборакбод намуданд.
Аз ҷумла қайд карда шуд, ки саҳми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар эҳёи суннатҳои қадимаи аҷдодонамон, яъне арҷгузорӣ ба Зан-Модар ва заҳматҳои шабонарӯзии ӯ дар таълиму тарбияи фарзандони солеҳ беназир аст.
Дар мизи мудаввар сармутахассиси шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангӣ Ш. Раҳматова ва мутахассиси пешбари шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон Л. Катахонова оид ба ҷанбаҳои гуногуни ин ҷашни муқаддас ва дар ин замина нақши мақомоти Ваколатдор оид ба ҳуқуқи инсон дар пешбурди ҳуқуқу озодиҳои занону духтарон дар ҳамкорӣ бо вазорату идораҳои дахлдори давлатӣ ва сохторҳои ҷомеаи шаҳрвандӣ баромад карданд.
Иштирокчиёни чорабинӣ маърӯзаҳои пешниҳодшударо муҳокима намуда, таманниёти худро ба модарони азиз ва хоҳарони меҳрубон иброз намуданд.
Дар раванди чорабинии идона дар васфи Зан-Модар аз бузургони адабиёти классикӣ ва муосир шеърҳо қироат карда шуданд.
Дар фарҷоми чорабинии идона Ваколатдор оид ба ҳуқуқи инсон дар Ҷумҳурии Тоҷикистон Умед Бобозода бори дигар ҳамагонро бо фарорасии ҷашни “Рӯзи Модар” муборакбод намуда, бонувони мақомотро бо гулҳои садбарг ва туҳфаҳои пулӣ қадрдонӣ намуданд.
Хадамоти матбуотии ВҲИ
