Тибқи Қонуни Ҷумҳурии Тоҷикистон «Дар бораи баробарӣ ва барҳам додани ҳама гуна шаклҳои табъиз», ки 19 июли соли 2022 қабул гардидааст, мақомоти Ваколатдор оид ба ҳуқуқи инсон дар Ҷумҳурии Тоҷикистон мақоми ваколатдори давлатӣ оид ба таъмини баробарӣ ва барҳам додани ҳама гуна шаклҳои табъиз ба ҳисоб меравад.
Яке аз вазифаҳои мақомот дар ин самт, ташкил ва гузаронидани чорабиниҳои иттилоотиву маърифатӣ дар самти ҳуқуқ ба баробарӣ ва барҳам додани ҳама гуна шаклҳои табъиз мебошад.
Вобаста ба ин, дар мувофиқа бо Ваколатдор оид ба ҳуқуқи инсон дар Ҷумҳурии Тоҷикистон гурӯҳи кори санаи 30 майи соли ҷорӣ дар ҳайати Бобоҷонзода Миҷгона – муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак, Маҷидов Парвиз Бухориевич – муовини сардори Шуъбаи ҳифзи давлатии ҳуқуқ ба баробарӣ ва озодӣ аз табъиз ва Давлатов Ҳамроҳхон Ҳайдарбекович ёрдамчии Ваколатдор оид ба ҳуқуқи кӯдак дар Ҷумҳурии Тоҷикистон дар ноҳияи Рашт чорабинии иттилоотӣ гузарониданд. Чорабинӣ бо мусоидати Маркази байналмилалии ҳуқуқи ғайритиҷоратӣ (ICNL) баргузор карда шуд.
Чорабинӣ бо роҳбарии муовини раиси ноҳияи Рашт, намояндагони мақомоти ҳифзи ҳуқуқ, сохторҳои кор бо занон ва оила, тандурустӣ ва ҳифзи иҷтимоӣ, маориф, нафақа ва суғуртаи иҷтимоӣ, меҳнат, муҳоҷират ва шуғли аҳолӣ, кор бо ҷавонон ва варзиш, дин, танзими анъана ва ҷашну маросим, ҳуқуқи кӯдак, Комиссариати ҳарбӣ, ходимони дин ва фаъолони ҷамъиятӣ, ҷамъ 62 нафар иштирок намуданд. Аз ин шумора 24 нафарашонро занон ташкил медоданд.
Дар чорабинии зикршуда мавзуъҳои «Мақомоти Ваколатдор оид ба ҳуқуқи инсон дар Ҷумҳурии Тоҷикистон - ниҳоди миллии ҳифзи ҳуқуқи инсон», «Зарурияти қабули Қонуни Ҷумҳурии Тоҷикистон «Дар бораи баробарӣ ва барҳам додани ҳама гуна шаклҳои табъиз», «Шарҳу тавзеҳи баъзе аз мафҳумҳои Қонуни Ҷумҳурии Тоҷикистон «Дар бораи баробарӣ ва барҳам додани ҳама гуна шаклҳои табъиз», «Салоҳияти Ҳукумати Ҷумҳурии Тоҷикистон ва ваколатҳои мақоми ваколатдори давлатӣ дар самти таъмини ҳифз аз табъиз дар Ҷумҳурии Тоҷикистон» ва «Ваколати мақомоти дигари давлатӣ ва мақомоти маҳалӣ дар самти ҳифз аз табъиз дар Ҷумҳурии Тоҷикистон» мавриди баррасӣ қарор дода шуданд.
Зимни чорабинӣ ҳозирин фаъолона иштирок намуда, оид ба табъизи инсон вобаста ба вазъи иҷтимоӣ, ҳуқуқи аққалиятҳои миллӣ, сару либоси тавсиявӣ дар муассисаҳои таълимӣ, ташвиқу тарғиби қонунгузории миллӣ саволҳо дода, ҷавобҳои қонеъкунанда гирифтанд.