Бахшида ба 35-солагии Истиқлолияти давлатии Ҷумҳурии Тоҷикистон ва Рӯзи байналмилалии ҳифзи кӯдакон 29 майи соли ҷорӣ дар шаҳри Душанбе бо иштироки муовини Сарвазири Ҷумҳурии Тоҷикистон, вазири маориф ва илми Ҷумҳурии Тоҷикистон, Ваколатдор оид ба ҳуқуқи кӯдак дар Ҷумҳурии Тоҷикистон, роҳабри Намояндагии Хазинаи кӯдакони СММ дар Тоҷикистон, вакилони Маҷлиси намояндагон, намояндагони вазорату идораҳо, муассисаҳои илмӣ-академӣ, шарикони рушд ва ҷомеаи шаҳрвандӣ конференсияи ҷумҳуриявӣ таҳти унвони “Сармоягузорӣ ба кӯдакон – заминаи рушди устувори давлат ва ҳифзи ҳуқуқҳои кӯдак” баргузор гардид.
Конференсияро муовини Сарвазири Ҷумҳурии Тоҷикистон Дилрабо Мансурӣ ифтитоҳ намуда, таъкид намуд, ки ҳифз ва сармоягузорӣ ба кӯдакон яке аз самтҳои калидии сиёсати иҷтимоии давлат ва Ҳукумати Ҷумҳурии Тоҷикистон ба ҳисоб рафта, он заминаи асосии рушди устувори ҷомеа ва таҳкими сармояи инсонӣ мебошад. Аз ин лиҳоз, дар ин самт пайваста иқдомҳои муассир роҳандозӣ мегардад ва яке аз ин иқдомҳо қабул шудани Барномаи ҳифзи ҳуқуқҳои кӯдак барои солҳои 2026-2030 мебошад.
Дар чорабинии мазкур Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Нигора Аминзода низ суханронӣ намуда, аҳаммияти сармоягузорӣ ба кӯдакон, таълиму тарбияи кӯдак дар оила, таҳкими ҳамкориҳо барои ҳифзи ҳуқуқҳо ва таъмини манфиатҳои қонунии кӯдаконро муҳим арзёбӣ намуд.
Конференсияи мазкур ҳамчун заминаи муҳимми мубодилаи афкор дар самти таҳкими сиёсати давлатӣ оид ба ҳифзи ҳуқуқҳои кӯдак арзёбӣ гардида, иштирокчиён омодагии худро барои густариши ҳамкориҳои минбаъда изҳор намуданд.
