Хабар
Сафари кории Муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак дар Ҷумҳурии Тоҷикистон ба ноҳияҳои Ховалинг ва Муъминободи вилояти Хатлон дар рӯзҳои 20 то 23 09.2022
Аз рӯзҳои 20 то 23 09.2022 дар ноҳияҳои Ховалинг ва Муъминободи вилояти Хатлон аз ҷониби Муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак дар Ҷумҳурии Тоҷикистон дар доираи амалисозии Нақшаи миллии амалҳо вобаста ба иҷрои тавсияҳои Кумитаи СММ оид ба ҳуқуқи кӯдак барои солҳои 2018-2022, Нақшаи кори Комиссияи назди Ҳукумати Ҷумҳурии Тоҷикистон оид ба ҳуқуқи кӯдак барои солҳои 2022 стратегияи фаъолияти мақомоти Ваколатдор оид ба ҳуқуқи инсон дар Ҷумҳурии Тоҷикистон барои солҳои 2021-2025 ва Барномаи амали мақомоти Ваколатдор оид ба ҳуқуқи инсон дар Ҷумҳурии Тоҷикистон барои соли 2022 сурат гирифт.
Зимни сафари корӣ бо раис ва муовинони раисони ноҳияҳои зикргардида оид ба масъалаҳои ҳифзи ҳуқуқи кӯдакон ва мушкилоти дар ин самт мавҷуда сӯҳбатҳои алоҳида гузаронида шуда, вохӯриҳо бо иштироки масъулони шуъбаҳои маориф, тандурустӣ ва ҳифзи иҷтимоии аҳолӣ, мақомоти ҳифзи ҳуқуқ, комиссияҳои маҳалӣ оид ба ҳуқуқи кӯдак, раисони ҷамоатҳои шаҳраку деҳот, сохторҳои ҷомеаи шаҳрвандӣ ва воситаҳои ахбори оммаи маҳаллӣ баргузор гардид.
Дар вохӯриҳо оид ба сиёсати давлат дар самти ҳифзи ҳуқуқҳои кӯдакон, амалишавии Конвенсия дар бораи ҳуқуқҳои кӯдак ва протоколҳои иловагии он, вазифа ва нақши Ваколатдор оид ба ҳуқуқи кӯдак, муқаррароти қонунҳои Ҷумҳурии Тоҷикистон “Дар бораи ҳифзи ҳуқуқҳои кӯдак”, “Дар бораи масъулияти падару модар дар таълиму тарбияи фарзанд”, “Дар бораи пешгирии зӯроварӣ дар оила”, эҳтироми фикри кӯдакон дар раванди ҳаёти оилавӣ, аҳамияти таълиму тарбияи кӯдак дар оила ва таъсири манфии фиристодани кӯдакон ба муассисаҳои будудоши доимӣ маълумоти муфассал пешниҳод карда шуд.
Ҳамзамон масъалаҳо доир ба дастрасии кӯдакон ба таҳсил, хадамоти тандурустӣ, ҳифзи иҷтимоӣ, мушкилоти кӯдакони бо қонун дар мухолифатбуда, таҳсилоти кӯдакони дорои маъюбият ва ѓайра мавриди баррасӣ ва муҳокима қарор дода шуд.
Инчунин ҷиҳати пешгирӣ намудани омилҳои номатлуб дар байни наврасон ба монанди муноқишаҳои гурӯҳи, зӯроварӣ нисбати кӯдакон, таҳсили духтарон дар зинаи сеюми таҳсилот ва баланд бардоштани маърифати ҳуқуқии аҳолӣ доир ба масъалаҳои мазкур тавсияҳо пешноҳод карда шуданд.
Ба иштирокчиёни вохӯриҳо маводҳои иттилоотӣ, маърӯзаи Ваколатдор оид ба ҳуқуқи инсон ва Ваколатдор оид ба ҳуқуқи кӯдак дар Ҷумҳурии Тоҷикистон барои соли 2021, маҷаллаи “Ахбори Ваколатдор оид ба ҳуқуқи инсон ва брошураи “Ҳуқуқҳои худро муҳофизат намо” дастрас гардонида шуд.
Аз ҷониби Ваколатдор оид ба ҳуқуқи кӯдак дар ноҳияи Ховалинг 11 нафар шаҳрвандон (8 -зан ва 3- мард), дар ҷамотҳои шаҳраку деҳоти ноҳияи Муминобод 13 нафар шаҳрвандон (9-зан ва 4-мард) қабул карда шуданд.
Шаҳрвандон асосан вобаста ба масъалаҳои таъминоти иҷтимоӣ (расонидани кӯмаки молиявӣ), ҳифзи иҷтимоии кӯдакони маъюб, муоширати кӯдакон бо волидайн ва хешовандони наздик, ҳифзи саломатӣ, гирифтани шаҳодатномаи таваллуд ва масъалаҳои дигар муроҷиат намуданд.
Зимни қабул муайян гардид, ки ҳануз ҳам дар самти мусоидат ба ҳифзи ҳуқуқҳои кӯдакони маъюбиятдошта ҳолатҳое вомехуранд, ки падару модарон бинобар надонистани ҳуқуқҳои худ ва тартиби муроҷиат барои муайян намудани маъюбияти кӯдакон ва ба расмият даровардани нафақаи маъюбият мушкили мекашанд, ки ин ҳолатҳо боиси саривақт баҳраманд нагардидани кӯдакон аз ҳуқуқу имтиёзҳои пешбинигардида мешаванд.
Вобаста ба масъалаҳои дар муроҷиатҳо гузошташуда ба шаҳрвандон маслиҳатҳои дахлдори ҳуқуқӣ дода шуданд.
Қабули шаҳрвандон дар ноҳияҳо бо иштироки раис, муовинони соҳавӣ доир гардида дар ҳалли масъалаҳои гузошташуда мусоидат намуд.
Зимни сафари кории худ Ваколатдор оид ба ҳуқуқи кӯдак боздид аз муассисаи таҳсилоти миёнаи умумии №6, ба номи Худоёр Раҷабов ноҳияи Ховалинг, маркази тавонбахшии рӯзона “Ғунча” барои кӯдакони имконияташон маҳдуд ва муассисаи томактабии “Маҳваш” ҷамоати деҳоти Ховалинг дидан намуд.
Инчунин зимни сафар аз муассисаи таҳсилоти миёнаи умумии №33 ҷамоати деҳоти Чилдухтарони ноҳияи Муминобод ва мактаб интернати ятимон ва бепарасторони ноҳияи мазкур дидан намуда, аз натиҷаи боздид ба роҳбарияти МиҲД ноҳияҳои мазкур ва роҳбарони муассисаҳо маслиҳатҳои дахлдор дода шуд.
