Боздиди Ваколатдор оид ба ҳуқуқи кӯдак аз Муассисаи давлатии таҳсилоти ибтидоии «Мактаб- интернати №4 барои кӯдакони имконияташон маҳдуд»-и ш.Душанбе
Ваколатдор оид ба ҳуқуқи кӯдак дар Ҷумҳурии Тоҷикистон М. Бобоҷонзода рӯзи 16 сентябри соли 2022 бо мақсади таҳлили вазъи риояи ҳуқуқи кӯдакони имконияташон маҳдуд аз Муассисаи давлатии таҳсилоти ибтидоии «Мактаб- интернати № 4 барои кӯдакони имконияташон маҳдуд» ва Муасссисаи давлатии таҳсилоти миёнаи умумии «Мактаб-интернати № 5 барои кӯдакони имконияташон маҳдуд»-и ш.Душанбе дидан намуд.
Зимни боздид Ваколатдор оид ба ҳуқуқи кӯдак ба роҳбарияти муассисаҳо оид ба Қонуни Ҷумҳурии Тоҷикистон «Дар бораи Ваколатдор оид ба ҳуқуқи инсон дар Ҷумҳурии Тоҷикистон», салоҳият ва ваколатҳои Ваколатдор оид ба ҳуқуқи кӯдак, қонунгузории амалкунанда дар самти ҳуқуқу озодиҳои кӯдакон дар Ҷумхурии Точикистон маълумот дод. Баъдан бо шароити синфхонаҳо, сифати таълими хонандагон, таҳияи ҷадвали дарсҳо, шароити кори омӯзгорон, тарзи ташкилу ба роҳ мондани раванди таълим, бо китобҳои дарсӣ ва асбобҳои аёнӣ таъмин будани хонандагону муаллимон, иштироки хонандагон ба дарс, нчунин бо шароити зисти кӯдакон, таъминоти онҳо бо ғизо ва муносибати кормандони муассиса бо кӯдакон аз наздик шинос шуд.
Ҳангоми боздид маълум гардид, ки дар муассисаҳо барои кӯдакон шароити хуби нигоҳдорӣ муҳайё буда, аз ҷониби давлату Ҳукумати ҷумҳурӣ ва Мақомоти иҷроияи ҳокимияти давлатӣ дар шаҳри Душанбе ва Вазорати маориф ва илми Ҷумҳурии Точикистон пайваста таваҷҷӯҳ зоҳир мегардад.
Дар охир Ваколатдор оид ба ҳуқуқи кӯдак ба роҳбарият ва кормандони муассисаҳо барои ғамхорӣ нисбати кӯдакон изҳори миннатдорӣ намуд.
