МЕНЮ
31
майи
2022
|
Табрикоти Муовини Ваколатдор оид ба ҳуқуқи инсон – Ваколатдор оид ба ҳуқуқи кӯдак дар Ҷумҳруии Тоҷикистон бо Рӯзи байналмилалии ҳифзи кўдакон |
![](/images/news/03-22/фото_рузи_1.jpg)
Кӯдакони азизу меҳрубон. Ҳамаи Шуморо бо фарорасии Рӯзи байналмилалии ҳифзи кӯдакон самимона табрику муборакбод намуда,
ба ҳамаи Шумо саломатию хушбахтӣ, осмони софу беғубор таманно менамоям.
Бо шарофати сиёсати оқилона ва заковати хирадмандонаи Асосгузори сулҳу ваҳдати миллӣ, Пешвои миллат Президенти Ҷумҳурии Тоҷикистон мӯҳтарам Эмомалӣ Раҳмон ҳифзу ҳимояи оила, кӯдак ва волидайн дар меҳвари давлатдории навини тоҷикон қарор дошта, рукни муҳими ҳаёти ҷамъиятӣ ба шумор меравад. Боварӣ дорам, ки кӯдакон ҳамчун насли нави ояндасози тоҷик баҳри пешрафту шукуфоии Тоҷикистони азизамон садоқатмандона саъю кӯшиш намуда, бо ташаббусҳои ноҷиб, талошҳои пайгирона, дастовардҳои фикриву эҷодӣ, варзишӣ ва хониши хубу аъло барои баланд бардоштани нуфуз ва эътибори Ватани маҳбубамон саҳм мегузоранд.
Боиси қайд аст, ки аз ҷониби давлату ҳукумат барои амалишавии орзуву ормонҳои кӯдакон бахусус кӯдакони ятиму бепарастор дилсузиву меҳрубонии хоса зоҳир мегардад. Пешвои муаззами миллат муҳтарам Эмомалӣ Раҳмон дар ҳамаи мулоқоту сӯҳбатҳои худ аҳли ҷомеаро ба анҷоми амалҳои хайр ва ғамхорӣ нисбат ба табақаҳои ниёзманди аҳолӣ, аз ҷумла кӯдакону наврасони ятиму бепарастор даъват намуда, дар ин радиф барои таъмини ҳифзи иҷтимоии онҳо пайваста иқдоми хайрхоҳона зоҳир менамоянд.
Кӯдакони азиз!
Шумо хазинаи ояндабахши фардои зиндагӣ ва ояндаи ҷомеа ҳастед. Боварӣ дорам, ки Шумо дар оянда шахсиятҳои бофарҳанг ва ватандӯсту худшинос ва ворисони арзанда ба камол расида, миллат, забон ва Ватани худро дӯст дошта, бо он ифтихор менамоед.
Бо чунин орзуҳои нек, бори дигар ҳамаи кӯдакони ҷумҳуриро ба муносибати Рӯзи байналмилалии ҳифзи кўдакон аз самими қалб табрику таҳният гуфта, таманнои онро дорам, ки дар оянда номбардори асили миллат ва Ватани хеш гардед .
Бори дигар саодатманду сарбаланд бошед.