Варақаи иттилоотӣ
оид ба Рӯзи умумиҷаҳонии мубориза бо меҳнати кӯдак
Рӯзи 10 июни соли 2022 бахшида ба Рӯзи умумиҷаҳонии мубориза бо меҳнати кӯдак, ки ҳамасола 12 июн дар тамоми ҷаҳон доир мегардад, ҳамоиш баргузор шуд.
Дар кори он роҳбарияти Вазорати меҳнат, муҳоҷират ва шуғли аҳолӣ, намояндагони Федератсияи иттифоқҳои касабаи мустақили Тоҷикистон, муовини Ваколатдор оид ҳуқуқи инсон - Ваколатдор оид ба ҳуқуқи кӯдак дар Ҷумҳурии Тоҷикистон, Иттиҳоди корфармоёни Ҷумҳурии Тоҷикистон, ҳамоҳангсозӣ Ташкилоти Байналмилалии Меҳнат дар Тоҷикистон, Хазинаи кӯдакони СММ дар Тоҷикистон мақомоти ваколатдори давлатӣ-мутасаддиёни таъминкунандаи ҳифзи меҳнати кормандони соҳаҳои иқтисоди ҷумҳурӣ ва коршиноси соҳаи ҳифзи меҳнат иштирок доштанд.
Бояд гуфт, ки Созмони Милали Муттаҳид 12 июнро ҳамчун Рӯзи умумиҷаҳонии мубориза бо меҳнати кӯдак муайян намудааст. Дар Ҷумҳурии Тоҷикистон Рӯзи ҷаҳонии мубориза бо меҳнати кӯдак аз соли 2005 инҷониб қайд гирифта мешавад.
Дар оғози ҷаласа муовини вазири меҳнат, муҳоҷират ва шуғли аҳолии ҷумҳурии Тоҷикистон, раиси Шӯрои ҳамоҳангсози байниидоравӣ оид ба барҳамдиҳии шаклҳои бадтарини меҳнати кӯдак Маҳмадуллозода Нурулло иброз дошт, ки мубориза бо меҳнати кӯдак масъалаи рушд аст ва мутобиқи сиёсати пешгирифта яке аз афзалиятҳои Ҳукумати Тоҷикистон ва сохторҳои давлатӣ дар пешбурди масоили ҳифзи ҳуқуқи кӯдак дониста мешаванд. Масъалаи ҳифзи кӯдакон ба Низомномаи ТБМ аз оғози ташкилёбиаш - соли 1919 ворид карда шудааст. Яке аз Конвенсияҳои аввалине, ки ТБМ қабул намудааст, ин конвенсия дар бораи синни ҳадди аққали қабул ба кор дар истеҳсолот мебошад. Аз 17 Ҳадафҳои рушди устувор як масъала «қабули чораҳои фаврӣ ва самаранок барои азбайн бурдани меҳнати маҷбурӣ, ғуломдории муосир ва савдои одамон, барҳам додани шаклҳои бадтарини меҳнати кӯдакон ва то соли 2025-ум азбайн бурдани меҳнати кӯдакон» муайян гардидааст.
Дар идома Маҳмадуллозода Н. зикр намуд, ки дар Тоҷикистон таваҷҷуҳ ба масъалаи мазкур аз Конститутсияи Ҷумҳурии Тоҷикистон, муқаррароти Кодекси меҳнати Ҷумҳурии Тоҷикистон, санадҳои эътирофнамудаи Тоҷикистон, аз ҷумла Ковенсияи СММ дар бораи ҳуқуқи кӯдак, Конвесияҳои Ташкилоти Байналмилалии Меҳнат № 138 “Оиди синни ҳадди ақали барои ба кор қабул кардан”, № 29 “Дар бораи меҳнати маҷбурӣ” ва №182 “Оиди манъ кардан ва аз байн бурдани шаклҳои бадтарини меҳнати кӯдак” ва Тавсияномаи ТБМ №190 “Оиди манъ намудан ва чораҳои зарурӣ андешидан ҷиҳати барҳам додани шаклҳои бадтарини меҳнати ноболиғон” сарчашма мегирад.
Зикр шуд, ки Ҷумҳурии Тоҷикистон дар ин самт ба дастовардҳои назаррас ноил гардида, системаи мониторинги меҳнати кӯдак, назорати он ва дигар роҳҳои таъсирасонро дар ин самт татбиқ намуда истодааст. Тибқи таҳлилҳо истифодаи меҳнати кӯдакон ба таври назаррас коҳиш ёфтааст.
Дар рафти нишасти мазкур Бобоҷонзода Миҷгона - муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак дар Ҷуҳурии Тоҷикистон, Файзизода Исмоил - муовини якуми раиси Федератсияи иттифоқҳои касабаи мустақили Ҷумҳурии Тоҷикистон, Акрамов Айёмбек - муовини раиси Иттиҳодияи корфармоёни Ҷумҳурии Тоҷикистон, Аминов Собир - ҳамоҳангсози Ташкилоти Байналмилалии Меҳнат дар Тоҷикистон, Шамсиддинов Салоҳиддин - масъули Барномаи ҳифзи кӯдаки Хазинаи кӯдакони СММ дар Тоҷикистон ва дигар коршиносони соҳа баромад намуда, ҷиҳати тақвияти фаъолияти ҳама сохторҳо дар самти барҳам додани меҳнати кӯдакон, ҳифзи иҷтимоии онҳо,ҷалби онҳо ба таҳсил, дастгирии иҷтимоӣ ва иқтисодии оилаҳои осебпазир таклифу пешниҳодҳо манзур намуданд.
