Дар доираи лоиҳаи “Ҳифзи кӯдакон дар раванди муҳоҷират дар Ҷанубу Шарқ, Ҷануб ва Осиёи Марказӣ” санаи 24 декабри 2019 аз ҷониби Ваколатдор оид ба ҳуқуқи кӯдак дар Ҷумҳурии Тоҷикистон дарр ҳамкорӣ бо ТҶ “Ҳуқуқ ва беҳбудӣ” дар меҳмонхонаи “Серена”-и шаҳри Душанбе мизи мудаввар дар мавзуи “Ҳеҷ кас дар вақти таваллуд набояд фаромуш шавад” баргузор гардид, ки дар он намояндагон аз вазорату идораҳои дахлдор ва сохторҳои ҷомеаи шаҳрвандӣ иштирок ва суханронӣ карданд.
Мизи мудавварро Ваколатдор оид ба ҳуқуқи кӯдак дар Ҷумҳурии Тоҷикистон Ҳабибулозода Р. ифтитоҳ намуда, дар бораи мақсади таъсиси Ваколатдор оид ба ҳуқуқи кӯдак, салоҳият ва фаъолияти он, ҳуқуқи кӯдак ба фардият, аз ҷумла бақайдгирии таваллуд, ҳуқуқ ба ном ва шаҳрвандӣ маълумоти муфассал пешниҳод намуданд. 
Ҳангоми суҳбат иштирокчиён дар бораи стандартҳои байналмилалӣ ва миллӣ оид ба ҳифзи ҳуқуқи кӯдак, бақайдгирии таваллуди кӯдаконе, ки волидайни онҳо дар ҳолати бешаҳрвандӣ қарор доранд ё ин ки шаҳрвандии тасдиқнашуда доранд, масъалаҳои бешаҳрвандӣ дар Ҷумҳурии Тоҷикистон ва баланд бардоштани маърифати ҳуқуқии шаҳрвандон ҷиҳати ба қайди давлатӣ гирифтани таваллуди кӯдакон дар мӯҳлатҳои муқарраршуда, мубодилаи афкор намуданд.
