Мувофиқи нақшаи кори Ваколатдор оид ба ҳуқуқи инсон рӯзи 27.03.2017 кормандони шуъбаи ҳифзи давлатии ҳуқуқҳои кӯдаки Дастгоҳи ВҲИ вазъи риояи ҳуқуқи кӯдаконро дар мактаби махсуси ҷумҳуриявии шаҳри Душанбе мавриди санҷиш қарор доданд.
Мактаби мазкур барои тарбия намудани ноболиғоне, ки қонунро вайрон намудаанд, ҷиноятҳои хавфноки ҷамъиятӣ содир намудаанд, мунтазам тартиботи ҷамъиятиро вайрон менамоянд ва ба назорати омӯзгорӣ эҳтиёҷ доранд, таъсис дода шудааст. Дар муассиса ноболиғони душвортарбия аз синни 11 то 14 сола таълим мегиранд.
Муассисаи мазкур барои 120 нафар ноболиғ пешбинӣ шуда, айни замон ҳамагӣ 41 нафар писар ба таҳсил фаро гирифта шудааст.
Дар вақти санҷиш бо роҳбарон ва кормандони мактаби мазкур вобаста ба вазъи риояи ҳуқуқҳои кӯдакон, сабабҳо ва тартиби ба мактаби махсус равон кардани кӯдакон, шароити нигоҳдорӣ, ҳуқуқ ба ҳифзи саломатӣ, таъминот бо ғизо, муносибат бидуни зӯроварӣ, муошират бо хешовандон суҳбатҳо доир гашта, бо шароити синфхонаҳо, шароити кори омӯзгорон, бо маводу китобҳои дарсӣ, асбобҳои аёнӣ, таъмин будани хонандагон, иштироки онҳо дар дарсҳо диққат дода шуд.
Аз суҳбат бо хонандагон маълум гардид, ки муносибати муаллимон бо онҳо хуб аст. Онҳо аз устодон ва тарзи таълимдиҳии онҳо розӣ буданд ва касе аз вайрон шудани ҳуқуқҳояш шикоят надошт. Инчунин барои беҳтар намудан ва баланд бардоштани сифати дониш ва тарбияи меҳнатии хонандагон маҳфилҳои махсус аз ҷумла: “Такмили савод”, “Музадӯзӣ”, “Технологияи иттилоотӣ” ва “Хӯрокпазӣ” амал менамоянд.
Шароити хуби фароғати кӯдакон ташкил карда шудааст. Дар таътили зимистона барои онҳо саёҳатҳо ба ҷойҳои таърихӣ ва марказҳои илмию фарҳангӣ, ташкил карда шуд.
Дар вохӯрӣ бо хонандагони муассиса оид ба ғамхории Ҳукумати Ҷумҳурии Тоҷикистон нисбати кӯдакон, дар бораи ҳуқуқҳои кӯдакон, қонунугузории миллӣ ва санадҳои байналмилалии аз ҷониби Тоҷикистон эътирофгардида, ки ҳуқуқҳои кӯдакро танзим менамоянд, пешгири ҷинояткорӣ дар байни ноболиғон, инчунин дар бораи фаъолияти Ваколатдор оид ба ҳуқуқи кӯдак, тартиби муроҷиат ба ӯ маълумот дода шуд.
Аз натиҷаи санҷиш ба масъулини мактаби мазкур тавсияҳои дахлдор дода шуд.
