Бо мақсади тақвияти ҳамкориҳо бо мақомоти маҳаллии ҳокимияти давлатии Ҷумҳурии Тоҷикистон дар самти ҳуқуқу озодиҳои инсон бо Фармони Ваколатдор оид ба ҳуқуқи инсон дар Ҷумҳурии Тоҷикистон ва дастгирии Намояндагии Хазинаи кўдакони СММ дар Тоҷикистон кормандони шуъбаи ҳифзи давлатии ҳуқуқҳои кўдаки Дастгоҳи Ваколатдор дар шаҳри Кўлоб, ноҳияҳои Восеъ ва Темурмалики вилояти Хатлон дар самти ҳуқуқу озодиҳои кўдакон вохўриҳо гузарониданд.
Намояндагони Ваколатдор бо мусоидати раисони шаҳру ноҳияҳои мазкур рўзи 12 март дар шаҳри Кўлоб, рўзи 13 март дар ноҳияи Восеъ ва рўзи 14 марти соли 2014 дар ноҳияи Темурмалик бо раисони Комиссия оид ба ҳуқуқи кўдак, мудирони шуъбаҳои кор бо занон, маориф, тандурустӣ, ҳифзи иҷтимоӣ, корҳои дохилӣ ва намояндагони ҷомеаи шаҳрвандӣ вохўрда, вазъи ҳуқуқи кўдаконро дар шаҳру ноҳияҳои мазкур мавриди муҳокима қарор доданд. Иштирокчиёни вохўрӣ бо Конвенсияи СММ дар бораи ҳуқуқи кўдак (аз ҷумла тавсияҳои Кумитаи СММ оид ба ҳуқуқи кўдак аз соли 2010 оид ба маърўзаи дуюми даврии Ҷумҳурии Тоҷикистон) ошно гардида, оид ба саҳми мақомоти Ваколатдор оид ба ҳуқуқи инсон дар барқарорсозии ҳуқуқҳои вайроншудаи кўдакон маълумот гирифтанд.
Дар вохўриҳо дастоварду мушкилот дар самти таъмини ҳуқуқи кўдак мавриди муҳокима қарор гирифта, муҳокимаҳо дар фазои озоду шаффоф доир гардида, аз ҷониби иштирокчиён барои минбаъд беҳтар кардани кор дар самти таъмини ҳуқуқҳои кўдакон як қатор таклифҳо пешниҳод гардиданд.
Тибқи Нақшаи фаъолияти мақомоти Ваколатдор дар соли 2014 чунин вохўриҳо дар дигар шаҳру навоиҳи ҷумҳурӣ низ ба назар гирифта шудаанд.
