Дар доираи чорабиниҳои банақшагирифтаи мақомоти Ваколатдор оид ба ҳуқуқи инсон дар Ҷумҳурии Тоҷикистон ҷиҳати баланд бардоштани маърифати ҳуқуқии аҳолӣ дар самти ҳуқуқи инсон, шарҳу тавзеҳи нуқтаҳои асосии Паёми Президенти Ҷумҳурии Тоҷикистон аз 16 декабри соли 2025 ва таҳкими ҳамкориҳо, санаи 12 майи соли ҷорӣ дар шаҳри Турсунзода мулоқоти навбатӣ баргузор гардид.
Дар чорабинӣ муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Нигора Аминзода, муовини раиси шаҳри Турсунзода Абдулозода Лайло, роҳбарони воҳидҳои сохтории мақомоти иҷроияи маҳаллии ҳокимияти давлатӣ, намояндагони мақомоти худидоракунии шаҳрак ва деҳот, директорони муассисаҳои таҳсилоти миёнаи умумӣ, ходимони дин, фаъолони ҷомеа, раисони маҳаллаҳо ва толибилмони фаъоли шаҳр иштирок намуданд.
Зимни чорабинӣ доир ба муҳтавои Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 16 декабри соли 2025, Қонуни Ҷумҳурии Тоҷикистон «Дар бораи масъулият барои таълиму тарбияи кӯдак», Қонуни Ҷумҳурии Тоҷикистон «Дар бораи ҳифзи ҳуқуқҳои кӯдак», инчунин Конвенсияи Созмони Милали Муттаҳид оид ба ҳуқуқҳои кӯдак маълумоти муфассал пешниҳод гардид.
Таъкид карда шуд, ки дар Паёми Президенти Ҷумҳурии Тоҷикистон самтҳои муҳими рушди сиёсӣ, иқтисодӣ, иҷтимоӣ ва фарҳангии кишвар мавриди таҳлилу баррасӣ қарор гирифта, ба масъалаҳои рушди технологияҳои инноватсионӣ, татбиқи иқтисоди рақамӣ, истифодаи зеҳни сунъӣ ва суръатбахшии раванди саноатикунонии кишвар таваҷҷуҳи махсус зоҳир гардидааст.
Дар ҳошияи чорабинӣ аз иштирокчиён даъват ба амал оварда шуд, ки ҷиҳати иҷрои босифат ва саривақтии дастуру супоришҳои дар паём ироагардида, фаъолияти худро боз ҳам тақвият бахшанд.
Ҳамчунин, дар доираи сафари корӣ Ваколатдор оид ба ҳуқуқи кӯдак бо аъзои комиссияи маҳаллӣ оид ба ҳуқуқи кӯдак мулоқот анҷом дода, бо таҳлил ва таъкиди вазъи ташвишовари ҷинояткорӣ нисбати ноболиғон ва аз ҷониби ноболиғон масъулин ҷиҳати пурзӯр намудани фаъолият дар самти кор бо оилаҳои осебпазир, кӯдакони ятиму бепарастор, кӯдакони маъюб ва ноболиғони дар мухолифат бо қонун қарордошта, инчунин ҷамъоварии маълумоти дақиқ оид ба вазъи кӯдакон дар ҳудуди шаҳр дастуру тавсияҳои мушаххас дода шуданд.
Дар идомаи сафар масъулин аз Маркази саломатии шаҳри Турсунзода, Муассисаи таҳсилоти миёнаи умумии №101 ва Ширхоргоҳ-кӯдакистони №4 «Лола»-и шаҳри Турсунзода боздид ба амал оварда, бо шароити хизматрасонии тиббӣ ва таълиму тарбияи кӯдакон аз наздик шинос шуданд.
Зимни суҳбат бо роҳбарият ва кормандони муассисаҳои мазкур ҷиҳати боз ҳам беҳтар намудани сатҳу сифати хизматрасонӣ ва таъмини ҳуқуқҳои кӯдакон тавсияҳои дахлдор пешниҳод гардиданд.
