Рӯзҳои 3-4 декабри соли 2020 дар меҳмонхонаи «Атлас»-и шаҳри Душанбе дар асоси Ёдошти тафоҳум байни шуъбаи ташкилоти «Good Neighbors» (Ҳамсоягии нек) дар Ҷумҳурии Тоҷикистон ва Вазорати маориф ва илми Ҷумҳурии Тоҷикистон ҷиҳати амалӣ гардонидани лоиҳаи «Мактаби бехатар:
Пешгирии зӯроварӣ нисбати кӯдакон, бо таваҷҷуҳ ба духтарон дар оила, мактаб ва ҷомеа» бо маблағгузории Хазинаи кӯдакони СММ (ЮНИСЕФ) маҷлиси ифтитоҳи баргузор гардид, ки дар он шарикони ҳамкори лоиҳа, аз ҷумла намояндагони Вазорати маориф ва илми Ҷумҳурии Тоҷикистон, раёсат ва шуъбаҳои маорифи ноҳияҳои зерҳадафи лоиҳа, намояндагони аъзоёни ҷомеа, иштирок ва суханронӣ карданд.
Лоиҳаи мазкур дар 35 муассисаҳои таълимӣ, аз ҷумла шахри Душанбе, ноҳияҳои Рӯдакӣ, Ҳисор, Восеъ, Ёвон, Б.Ғафуров ва шаҳри Исфара амалӣ карда мешавад ва ҳадафи ниҳоии барнома ин то соли 2022 таҳияи механизми бехатар ва мусоиди пешниҳоди арзу шикоятҳо баҳри пешгирии хушунат нисбати кӯдакон хусусан духтаронро дар бар мегирад.
Дар маҷлиси мазкур мутахассиси пешбари шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон дар Ҷумҳурии Тоҷикистон Машрабзода А. иштирок намуда, вобаста ба “Тартиби баррасиии муроҷиати кӯдакон дар мақомоти Ваколатдор оид ба ҳуқуқи инсон дар Ҷумҳурии Тоҷикистон”, ки бо фармони Ваколатдор оид ба ҳуқуқи инсон дар Ҷумҳурии Тоҷикистон аз санаи 19.09. 2020 №72 тасдиқ гардидааст ва он раванди қабул, бақайдгирӣ, баррасӣ ва ҳалли муроҷиатҳои кӯдакон, намояндагони онҳо ва дигар шахсонро аз ном ва ба манфиати кӯдакон дар мақомоти Ваколатдор оид ба ҳуқуқи инсон дар Ҷумҳурии Тоҷикистон муайян мекунад, изҳори ақида намуд.
