ХОВАЛИНГ, 21.08.2020 АМИТ /«Ховар»/. Хонандагону омӯзгорони муассисаи таълимии рақами 27-и деҳаи Қадаҳии ноҳияи Ховалинг соли нави таҳсили 2020-2021-ро дар бинои замонавӣ истиқбол гирифтанд. Бинои мазкур бо фармоиши Дирексияи сохтмони иншооти ҳукуматии назди Дастгоҳи иҷроияи Президенти Ҷумҳурии Тоҷикистон аз ҷониби ширкати сохтмонии КСМ-24 дар муҳлати муайяншуда ва бо сифати баланд ба истифода супорида шуд.
Тавре роҳбари ҶСК «КСМ-24» Ҷамшед Ҳабибуллоев ба хабарнигори АМИТ “Ховар” иттилоъ дод, бинои мазкур аз 6 синфхона, хонаи омӯзгорон, утоқи директори мактаб, синфхонаи компютерии муҷаҳҳаз бо 10 адад компютер ва шабакаи мустақими гармидиҳӣ иборат буда, минбаъд дар он дар як баст беш аз 160 хонанда ба таълим фаро гирифта мешаванд. Синфхонаҳо бо мизу курсӣ ва дигар лавозимоти таълимӣ таъмин карда шудаанд. Сокинони деҳа ва хонандагон барои ин ғамхориҳо миннатдории хешро ба роҳбарияти олии мамлакат баён намуданд.
Зикр гардид, ки давоми солҳои соҳибистиқлолии мамлакат бо ҷаҳду талошҳои Президенти ҷумҳурӣ муҳтарам Эмомалӣ Раҳмон дар ноҳияи Ховалинг 36 муассисаи нави таълимӣ ба истифода супорида шуда, то ҷашни 30-солагии Истиқлолияти давлатии Ҷумҳурии Тоҷикистон ба истифода додани чанд мактаби дигар дар назар аст.
