Мувофиқи нақшаи амали мақомоти Ваколатдор оид ба ҳуқуқи инсон рӯзи 19 июни соли 2020 кормандони шуъбаи ҳифзи давлатии ҳуқуқҳои кӯдаки Дасгоҳи ВҲИ дар самти вазъи риояи ҳуқуқи кӯдакон дар Қабулгоҳ-таҳвилгоҳи Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилии Ҷумҳурии Тоҷикистон дар шаҳри Душанбе санҷиш гузарониданд.
Ба муассиса ноболиғони аз синни 3-сола то 18-сола, ки ба оворагардӣ ва талбандагӣ машғуланд, кӯдакони гумшуда, партофташуда, худсарона аз оила рафта ҷойгир карда мешаванд.
Қабулгоҳ-таҳвилгоҳ барои 30 нафар ноболиғ пешбинӣ шуда, дар он ҷо ноболиғон ба муҳлати то 30 шабонарӯз нигоҳ дошта мешаванд. Дар ҳолати истисноӣ мӯҳлати нигоҳдорӣ бо қарори Комиссия оид ба ҳуқуқи кӯдаки ш. Душанбе ба мӯҳлати то 30 шабонарӯз дароз карда мешавад.
Дар рафти санҷиш бо 3 писар ва 2 духтар, ки дар Қабулгоҳ-таҳвилгоҳ нигоҳ дошта шуда буданд, бо ҳар яке аз онҳо сӯҳбатҳои алоҳида гузаронида шуд.
Ноболиғон аз муносибати кормандони Қабулгоҳ-таҳвилгоҳ изҳори қаноатмандӣ намуданд. Ҳолатҳои зуроварӣ, таҳқир, ҷалби ноболиғон ба корҳои ба онҳо вобастанабуда ҷой надоранд. Ноболиғон аз шароити зист ва хурду хӯрок розӣ мебошанд.
Дар вақти санҷиш бо роҳбарон ва кормандони Қабулгоҳ-таҳвилгоҳ вобаста ба вазъи риояи ҳуқуқҳои кӯдакон, сабабҳо ва тартиби ба Қабулгоҳ-таҳвилгоҳ овардани кӯдакон, шароити нигоҳдорӣ, ҳуқуқ ба ҳифзи саломатӣ, таъминот бо ғизо, муносибат бидуни зӯроварӣ, муошират бо хешовандон суҳбатҳо доир карда шуданд.
Дар Қабулгоҳ-таҳвилгоҳ ҳамагӣ 4 ҳуҷра барои кӯдакон ҷудо шудааст. Аз он барои писарбачаҳо 2 ҳуҷра, барои духтарон 1 ҳуҷра ва ҳуҷраи изоляторӣ, ки ҳамаи кӯдакон баъди муоинаи тиббӣ, бақайдгирӣ ва ба анҷом расонидани дигар тартиботи муқараршуда дар ин ҳуҷраҳо ҷойгир карда мешаванд.
Инчунин дар Қабулгоҳ-таҳвилгоҳ утоқи махсус барои фароғат бо телевизор ва шоҳмот мавҷуд аст. Ҳолати тозагӣ ва санитарию гигении ҳуҷраҳо ба талабот ҷавобгӯ мебошад.
Аз натиҷаи санҷиш ба масъулини муассисаи мазкур тавсияҳои дахлдор дода шуданд.
