Рӯзи 22 июни соли ҷорӣ Ваколатдор оид ба ҳуқуқи кӯдак дар Ҷумҳурии Тоҷикистон Ҳабибулозода Раҷабмо бо ҳайати муштараки Дафтари СММ оид ба маводҳои мухаддир ва ҷинояткорӣ (UNODC), Дафтари зиддитерористии СММ (UNOCT) ва Маркази мубориза бо терроризми СММ (UN-CTC) тариқи бархат (онлайн) мулоқот намуд.
Мавзӯи мулоқот масъалаи вазъи кӯдакони зарардида дар низоъҳои мусаллаҳона, роҳандозии фаъолияти ҳамоҳангшудаву босамар дар мубориза бо терроризму ифротгароӣ, пешгирии шомилшавии шаҳрвандон ба созмону ҳаракатҳои террористию ифротии фаромиллӣ, аз ҷумла пешгирӣ ва вокуниш ба зӯроварӣ нисбати кӯдакон аз ҷониби гуруҳҳои террористӣ ва ифротгароии хушунатбор буд.
Зимни мулоқот Ваколатдор оид ба ҳуқуқи кӯдак аз ташаббуси инсондӯстонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба Ватан баргардонидани кӯдакон - шаҳрвандони Ҷумҳурии Тоҷикистон аз минтақаҳои ҷангзада ёдовар шуда, ҳамзамон қайд намуд, ки Ҳукумати ҷумҳурӣ ин кӯдаконро мавриди ҳимоя ва ғамхории махсус қарор додааст.
Роҳбари Дафтари минтақавии СММ оид ба маводҳои мухаддир ва ҷинояткорӣ (UNODC) - хонум Ашита Миттал низ ин таҷрибаи Ҷумҳурии Тоҷикистонро ҳамчун таҷрибаи ибратомӯз барои дигар давлатҳои минтақа арзъёбӣ намуда, омодагии Дафтарро ҷиҳати расонидани кӯмаки техникӣ дар масъалаи ба ҷомеа воридшавии ин кӯдакон баён намуд.
Зимни мулоқот Ҳабибулозода Р. оид ба сиёсати давлат дар самти таъмини манфиатҳои беҳтарини кӯдак, тадбирҳо оид ба пешгирии экстремизм ва террроризм дар байни ноболиғон ва ҷавонон ва фаъолияти Ваколатдор оид ба ҳуқуқи кӯдак дар ин самт маълумот дод.
Тарафҳо омодагии якдигарро ҷиҳати идома додани ҳамкориҳои мутақобилаи судманд баҳри ҳифзи ҳуқуқҳои кӯдакон дар Тоҷикистон изҳор намуданд.
