Дар доираи амалисозии Стратегияи фаъолияти Ваколатдор оид ба ҳуқуқи кӯдак барои солҳои 2018-2020 санаи 3 майи соли 2018 дар МТМУ №72 ноҳияи Фирдавсии шаҳри Душанбе ба номи Гулчеҳра Сулаймонӣ аз ҷониби кормандони шуъбаи ҳифзи давлатии ҳуқуқҳои кӯдак санҷиш гузаронида шуд. Ҳадафи аз санҷиш муайян намудани вазъи риояи ҳуқуқи дастрасии кӯдакон, аз ҷумла кӯдакони дорои маъюбият ба таҳсили босифат дар муҳити фарогир мебошад.
Муассисаи таълимӣ соли 2010 бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ифтитоҳ ёфта, 60 синфхона дорад ва барои таҳсили 1296 хонанда пешбинӣ шудааст. Бо мақсади омода намудани кӯдакон ба таҳсилоти ибтидоӣ дар назди муассисаи таълимӣ Маркази инкишофи кӯдак фаъолият менамояд, ки 120 нафар кӯдакони синни томактабиро фаро гирифтааст. Дар муассисаи таълимӣ бо мусоидати ТҶ “Ирода” 13 нафар кӯдакони дорои аутизм таълиму тарбия мегиранд.
Натиҷаи санҷиш нишон дод, ки умуман дар муассиса барои таълими хонандагон шароити зарурӣ фароҳам оварда шудааст. Ҳамзамон, ҷиҳати дар муассисаи таълимии мазкур фароҳам овардани муҳити бемонеа барои кӯдакони маъюб ба роҳбарияти муассиса тавсияҳои дахлдор пешниҳод карда шуданд.
Зимни санҷиш дар маҷлисгоҳи мактаб бо хонандагони синфҳои болоӣ ва омӯзгорон вохӯрӣ гузаронида шуда, оид ба сиёсати давлат дар самти ҳифзи ҳуқуқу озодиҳои кӯдак, фаъолияти Ваколатдор оид ба ҳуқуқи инсон ва Ваколатдор оид ба ҳуқуқи кӯдак маълумоти муфассал пешниҳод карда шуд. Аз ҷумла, оид ба дастгирии ҳамаҷонибаи ҷавонони лаёқатманд ва хусусан духтарон аз ҷониби Ҳукумати ҶТ, пешгирии ҷинояткорӣ ва шомилшавии наврасон ба ҳизбу ҳаракатҳои тундраву ифротгаро, парҳез намудан аз тамошои наворҳои фаҳшу зӯроварӣ дар интернет, риоя намудани вақти шабона барои кӯдакон, канораҷӯӣ намудан аз гурӯҳбозӣ ва маҳалгароӣ, эҳтироми қонунҳои амалкунанда, қоидаҳои дохилимактабӣ, омӯзгорон ва падару модарон изҳори андеша карда шуд.
Дар фарҷоми санҷиш аъзои гурӯҳи корӣ бо директори мактаб суҳбати ҷудогона доир намуда, натиҷаҳои пешакии санҷишро баён ва ҷиҳати бартараф намудани камбудиву норасоиҳои ошкоршуда тавсияҳои дахлдорро пешниҳод намуданд.
Сардори шуъбаи ҳифзи давлатии ҳуқуқҳои кӯдак А. Содиқов
