Тибқи Нақшаи кори Гурўҳи мониторингии назди Ваколатдор оид ба ҳуқуқи инсон рӯзҳои 19-20 апрели соли 2018 аз ҷониби аъзоёни гурӯҳи мониторингӣ дар Литсейи касбии махсуси Вазорати меҳнат муҳоҷират ва шуғли аҳолии Ҷумҳурии Тоҷикистон бо мақсади муайян намудани вазъи риояи ҳуқуқҳои ноболиғон мониторинг гузаронида шуд.

Дар рафти мониторинг тибқи тартиби муқарраршуда сараввал бо роҳбарият, кормандон ва ҳар як ноболиғи дар муассиса қарордошта аз рӯи саволномаи тартибдодашуда сӯҳбати алоҳида гузаронида шуд.

Аз суҳбат бо роҳбарияти муассиса маълум гардид, ки тарбиятгирандагони Литсейи мазкур мавриди таваҷҷӯҳи доимии роҳбарияти Вазорати меҳнат муҳоҷират ва шуғли аҳолии Ҷумҳурии Тоҷикистон қарор дошта, онҳо пайваста ба омӯзиши донишу касбҳои муосир аз рӯи ихтисосҳои гуногун чун «Сартарош», «Кафшергари барқӣ» ва «Интернет ва технология» фаро гирифта мешаванд. Ҷиҳати роҳ надодан ба муносибатҳои ғайриоинномавӣ ва бартараф намудани камбудиҳо дар ин самт пайваста тадбирҳои зарурӣ андешида мешаванд.

Санҷиши шароити моддӣ-маишии муассиса нишон дод, ки ҷойи хоби ноболиғон ба талаботи меъёрҳои санитарию гигиенӣ ҷавобгў буда, ноболиғон бо сару либоси якхелаи босифат таъмин мебошанд ва ҳуҷраҳои маишию фароғатӣ, ҷойҳои дастурўшуӣ ва ҷомашуйӣ бо воситаҳои зарурӣ муҷаҳҳаз шудаанд. Ҳамзамон масъалаҳои эҳтимолияти истифодаи зўроварӣ ва таҳқир дар байни ноболиғон, ҳолатҳои худсарона баромада рафтан аз ҳудуди литсейи мазкур ва ҷалби ноболиғон ба корҳои тарбиявӣ мавриди санҷиш қарор дода шуданд.

Қобили қайд аст, ки чунин мониторингҳо мутобиқи нақшаи кори Гурӯҳи мониторингӣ дар дигар муассисаҳои пӯшида ва қисман пӯшида дар назар дошта шуда, натиҷаи онҳо бо иштироки намояндагони мақомотҳои давлатӣ, ҷомеаи шаҳрвандӣ ва воситаҳои ахбори омма мавриди муҳокима қарор дода хоҳанд шуд.