Ҳамасола дар Тоҷикистон санаи 10 декабр ҳамчун Рӯзи ҳуқуқи инсон таҷлил гардида, бахшида ба ин сана мақомоти Ваколатдор оид ба ҳуқуқи инсон дар доираи «Ҳафтаи ҳуқуқи инсон» чорабиниҳои гуногун мегузаронад.
Дар ин робита, ҷиҳати ташвиқу тарғиби дастовардҳои Ҷумҳурии Тоҷикистон дар самти ҳифзи ҳуқуқу озодиҳои кӯдак ва таъмини манфиатҳои беҳтарини онҳо, инчунин натиҷагирӣ аз санҷишу мониторингҳои мақомот дар муассисаҳои кӯдакона дар соли 2025 бо иштироки намояндагони мақомоти давлатӣ, ҷомеаи шаҳрвандӣ, ва шарикони рушд, ки бо кӯдакон фаъолият мебаранд, санаи 11 декабри соли ҷорӣ дар меҳмонхонаи “Ҳилтон” бо мусоидати дафтари Намояндагии Хазинаи кӯдакони СММ мизи мудаввар баргузор гардид.
Дар чорабинӣ У.Бобозода – Ваколатдор оид ба ҳуқуқи инсон дар Ҷумҳурии Тоҷикистон, Эри Двиведӣ – муовини роҳбари Намояндагии Хазинаи кӯдакони СММ дар Тоҷикистон, М.Бобоҷонзода – муовини Ваколатдор оид ба ҳуқуқи инсон – Ваколатдор оид ба ҳуқуқи кӯдак, З.Абдусаматзода – муовини вазири тандурустӣ ва ҳифзи иҷтимоии аҳолӣ, роҳбарони воҳидҳои сохтории ҳифзи ҳуқуқҳои кӯдаки Суди Олӣ, Прокуратураи генералӣ, вазоратҳои маориф ва илм, корҳои дохилӣ, тандурустӣ ва ҳифзи иҷтимоии аҳолӣ, адлия, меҳнат, муҳоҷират ва шуғли аҳолӣ, Кумитаи кор бо занон ва оила, Кумитаи таҳсилоти ибтидоӣ ва миёнаи касбӣ ва намояндагони иттиҳодияҳои ҷамъиятӣ иштирок намуданд.
Зимни чорабинӣ сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, дастгириву иқдомоти муассири давлат ва Ҳукумати Ҷумҳурии Тоҷикистон ва муқаррароти қонунгузории амалкунанда дар самти ҳифзи ҳуқуқу озодиҳо ва таъмин манфиатҳои беҳтарини кӯдакон махсус таъкид гардид.
Ҳамчунин, дар рафти чорабинӣ масъалаҳои, ҳамгироии иҷтимоии занону кӯдакони аз минтақаҳои ҷангзада баргардондашуда, ҳифзи ҳуқуқу озодиҳои кӯдакони бо қонун дар мухолифатбуда, ҳифзи ҳуқуқу озодиҳои кӯдакон дар ҳошияи таъмини ҳуқуқ ба таҳсил, саломатӣ, ҳифзи иҷтимоӣ, ислоҳоти низоми адолати судӣ нисбат ба кӯдакон ва таъмини манфиатҳои беҳтарини кӯдакон дар Тоҷикистон матраҳ гардида, дастовард, мушкилот ва дурнамои соҳа тавзеҳ дода шуд.
Дар рафти мизи мудаввар масъулини самти кор бо кӯдакон бо "Сипоснома"-и Ваколатдор оид ба ҳуқуқи инсон қадрдонӣ шуданд.
