Имрӯз муовини Ваколатдор оид ба ҳуқуқи инсон дар Ҷумҳурии Тоҷикистон - Ваколатдор оид ба ҳуқуқи кӯдак дар Ҷумҳурии Тоҷикистон дар Конфронси ҷумҳуриявии илмию амалӣ дар мавзӯи «Рушди қонунгузории Ҷумҳурии Тоҷикистон дар самти муқовимат ба савдои одамон ва расонидани кумак ба қурбониёни савдои одамон: мушкилот ва дурнамо» иштирок ва суханронӣ намуд.

Дар чорабинӣ намояндагони мақомоти давлатӣ, ташкилотҳои байналмилалӣ ва ҷомеаи шаҳрвандӣ масъалаҳои муҳимми такмили заминаи ҳуқуқии кишвар, усулҳои муосири пешгирии ҷиноятҳо ва механизми ҳифзи ҳуқуқҳои шахсоне, ки аз савдои одамон зарар дидаанд, мавриди баррасӣ қарор доданд.

Ваколатдор оид ба ҳуқуқи кӯдак зимни баромади худ таъкид дошт, ки ҳифзи кӯдакон аз ҳама гуна шаклҳои истисмор ва савдои одамон яке аз самтҳои афзалиятноки сиёсати давлатии Ҷумҳурии Тоҷикистон ба шумор меравад. Қайд карда шуд, ки таҳкими қонунгузорӣ ва фароҳам овардани шароити мусоид барои барқарорсозии равониву иҷтимоии қурбониёни кӯдакон кафолати ояндаи солимии ҷомеа мебошад.

Дар доираи конфронс иштирокчиён пешниҳодҳоро оид ба тасвиби усулҳои нави расонидани кумаки ҳуқуқӣ, психологӣ ва иҷтимоӣ ба қурбониёни савдои одамон муҳокима намуда, самтҳои дурнамои ҳамкориҳои муштаракро муайян карданд.

22 октябри соли 2026 конфронси миллӣ таҳти унвони «Дастрасии занунону духтарон ба адолати судӣ» бо иштироки намояндагони мақомоти давлатӣ, ҷомеаи шаҳрвандӣ ва созмонҳои байналмилалӣ доир гардид, ки дар он муовини Ваколатдор оид ба ҳуқуи инсон - Ваколатдор оид ба ҳуқуқи кӯдак Муқимӣ Нигора Аминзода ширкат варзида, атрофи мавзуи баррасишаванда суханронӣ намуд

Қайд гардид, ки сиёсати давлатии Ҷумҳурии Тоҷикистон дар самти ҳифзи ҳуқуқу озодиҳои инсон ва таъмини баробарии ҳуқуқу имкониятҳо ба Конститутсияи Ҷумҳурии Тоҷикистон ва ӯҳдадориҳои байналмилалии кишвар асос ёфтааст. Конститутсия баробарии ҳуқуқу озодиҳои мардону занонро кафолат дода, оиларо ҳамчун асоси ҷомеа таҳти ҳимояи давлат қарор додааст.

Таҳти роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвар заминаҳои ҳуқуқӣ ва институтсионалии таъмини баробарии ҳуқуқу имкониятҳои мардону занон ва ҳифзи ҳуқуқҳои занону духтарон пайваста тақвият меёбанд.

Илова карда шуд, ки қонунгузории миллӣ дар бораи кафолатҳои давлатии баробарҳуқуқии мардону занон, пешгирии зӯроварӣ дар оила, расонидани ёрии ҳуқуқӣ, инчунин баробарӣ ва барҳам додани ҳама гуна шаклҳои табъиз барои ҳифзи ҳуқуқу манфиатҳои занону духтарон заминаи муҳим фароҳам овардааст.

Бо вуҷуди заминаи ҳуқуқии фароҳамовардашуда, татбиқи самараноки кафолатҳои пешбинишуда ҳанӯз ҳам тақвияти талошҳои муштаракро тақозо менамояд. Дар амал, баъзе занону духтарон бо мушкилоти вобаста ба нокифоя будани огоҳии ҳуқуқӣ, дастрасии маҳдуд ба хизматрасониҳои ҳуқуқӣ, вобастагии иқтисодӣ ва монеаҳои иҷтимоӣ рӯ ба рӯ мешаванд. Ин ҳолат зарурати тақвияти чораҳои амалӣ ва наздик намудани хизматрасониҳои ҳуқуқиро ба аҳолӣ боз ҳам муҳим мегардонад.

Дар маҷмуъ, чорабинӣ дар фазои ҳамдигарфаҳмӣ сурат гирифта, дар он масъалаҳои матраҳшуда муҳокима гардиданд, инчунин ҷиҳати таҳким ва муайян сохтани роҳҳои нави ҳамкорӣ дар самти беҳтар намудани дастрасии занону духтарон ба адолати судӣ тавсияҳои амалӣ пешниҳод карда шуданд.

       Рӯзи 21 октябри соли 2026 дар бинои дастгоҳи марказии Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо иштироки аъзои гурӯҳи мониторингии Раёсати Созмони Милали Муттаҳид оид ба маводи мухаддир ва ҷинояткорӣ (UNODC), намояндагони Ваколатдор оид ба ҳуқуқи инсон дар Ҷумҳурии Тоҷикистон ва вазорату идораҳои дахлдори кишвар даври дуюми шарҳи татбиқи Конвенсияи Созмони Милали Муттаҳид зидди коррупсия дар Ҷумҳурии Тоҷикистон баргузор гардид.

      Дар ҷараёни чорабинӣ масъалаҳои татбиқи боби II ва V Конвенсия, аз ҷумла, пешгирии коррупсия, такмили механизмҳои назорати давлатии молиявӣ, пешгирии қонунигардонии даромадҳои бо роҳи ҷиноят бадастомада, ҳамкориҳои байниидоравӣ ва байналмилалӣ, инчунин ошкор, пайгирӣ, мусодира ва баргардонидани дороиҳои бо роҳи ҷиноят бадастомада баррасӣ шуданд.

      Дар чорабинии мазкур муовини Ваколатдор оид ба ҳуқуқи инсон дар Ҷумҳурии Тоҷикистон-Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Н.А. иштирок намуда, оид ба тадбирҳои андешидашуда ҷиҳати иҷрои уҳдадориҳои байналмилалии кишвар ва татбиқи муқаррароти моддаҳои 10 ва 13-и Конвенсия маълумот пешниҳод намуданд.  

      Дар фарҷоми чорабинӣ ҷонибҳо аҳамияти чунин ҳамкориҳоро дар баланд бардоштани самаранокии чораҳои зиддикоррупсионӣ таъкид намуда, омодагии худро барои идомаи ҳамкориҳои созанда ва табодули таҷриба дар самти пешгирӣ ва муқовимат ба коррупсия иброз доштанд.

            15 октябр дар шаҳри Душанбе Хакатони минтақавӣ оид ба ҳифзи кӯдакон дар муҳити интернет бо истифода аз зеҳни сунъӣ (ЗС) баргузор гардид, ки дар он муовини Ваколатдор оид ба ҳуқуқи инсон – Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Нигора Аминзода иштирок ва суханронӣ намуданд.

Подробнее...

 13 октябри соли 2026, дар меҳмонхонаи «Ҳаят Реҷенсӣ»-и шаҳри Душанбе таҳти унвони «Тасдиқи Конвенсия дар бораи ҳуқуқи маъюбон -ташаббуси навбатии Тоҷикистон дар татбиқи Ҳадафҳои рушди устувор» мизи мудаввар аз ҷониби Маҷлиси намояндагони Маҷлиси Олии Ҷумҳурии Тоҷикистон дар ҳамбастагӣ бо шарикони рушд баргузор гардид, ки дар он муовини Ваколатдор оид ба ҳуқуқи инсон -Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Н.А. иштирок ва суханронӣ намуд.

Подробнее...